العدد الخامس ------------------- شباط 2004  

 ( عودة للبداية ) – ( عودة للفهرس )

مشاهدات

 

 

                                     كامل الركابي

 

 

وردة

 

شفت..

ورده ازهرت

مابين عاﮔول

تمد رﮔبتها لخيوط الشمس

تحلم..عمرها ايطول

ﻟﭼن هالشوك

آه ...الشوك

خنجر حسد..مسلول!

 

نسمة

 

شفت..

نسمه ابلهب آب

ردت منها عشگ

ماضَّيع احباب

صعد دم ابوجهها

وسدَّت الباب !

 

حمامة

 

شفت..مره

حمامه اتلوب

انشدتها عن حزنها

رادت اتذوب !

 

صمت

 

شفت..

فيض السكوت اشكال

ﮔطره وساجيه,

ونهر وبحر وآمال

وشفت آخرعشگ

ﭼتال !

 

خوف

 

شفت..

وجه العشگ..خوّاف

تحيا اشفاف لشفافه

وتموت اشفاف

ﻟﭼن...خوّاف

شارد من ملامه ابعيد

لاعنده إذن سمعت

ولاعنده ﮔلب شاف !

 

حرية

 

شفت..

طيره..تخاف اتطير

انشدتها- اللعب-

السمه وسعه

ونوم القفص..تكسير

ﮔﺎلت لي:الجنح ,

هذا الجنح لليوم

هم مشكول

هم ازغير !

 

حُب

 

شفت..مره

ﮔلب مذبوح

ضميته اعله صدري ,

اسمعت آخرنبضه ,

بآخر اغنيتها اتبوح:

حبيبي ياحبيبي

العمر فدوه ايروح إلك

ياروحي

فدوه ايروح  !

 

حلم

 

شفت..مره

حلم ..يبـﭼي

ﮔتله إشبيك  ؟

ﮔلي :اعيون احبها ابعيد

سكتت

مابعد ﺘﺤﭽﻲ  !

 

اصابع

 

شفت..مره

اصابع مريم

            اشموع

مسيت الاصابع ,

       ﮔﺎمت اتموع  !

 

ممنوع

 

شفت..

بالبار..أبعد صوت

مسموع

وقطعه إﻤﻌﻟِﮔﻪ اعله الحايط

تفيض ابحزنها..ادموع

مهظومه ,

انكتب بيها :

( الغنا اعله الناس ممنوع)  !

 

شاعر

 

شفت..

شاعر..

مطر..دربه

يضم اسراره بعيونه ,

تروح

اتفيض من ﮔلبه !

 

رسام

 

شفت..

رسام..

يرسم بالعذابات

ﭽفه إحجار

وايامه إنتفاضات !

 

خجل

 

شفت..

اعيون ,

لورمشت خجل ,

تعمي .

وشفت..

إخدود ,

لوضحكت شمس ,

تدمي

وشفت..

إشفاف تسكت

لوﺤﭽو ب اسمي !

 

صلاة

 

شفت..

آخر صلاة الروح

                لعيونك

وشفت..

حسّاد من يومين ,

ﭽﺎنوا من تمر تضحك

               يزعلونك

مدري اشلون ,

غمضة عين..

فتحة عين..

صاروا همّه الاحباب

              ويعبدونك !

 

ضياع

 

شفت..

هجر المحب ..سِلْ

وعذاب اﻟﻤﭽوي

            ب الظِلْ

وضياع

     الماحظه ابخِلْ  !

 

فقر-1-

 

شفت ..

شيخ الفقر ..مره

بين الناس,

من تاريخه..يتبره

ﮔتله : احوال !

ضَحَك ,

طلعت اسنونه

امسوسه وصفره  !

 

فقر-2-

 

شفت..

وجه الفقر ..مره

بين الناس ,

يضوي اشموع حُب خضره

ﮔتله : احوال !

ضَحَك ,

نزلت الدمعه الغايمه ابعينه

 ومطر حسره !

 

جوع

 

شفت ..مره

         طفلتين ,

متيبسات يم تنور بارد

مطفي ﮔيظين

انشدت عنهن

بعد نسيان ..سنتين

ﮔﺎلولي :

ﺒﭽتْ امهن على التنور

من الجوع ,

طحنتهن ..

وعجنتهن..

وسوتهن خبزتين  !

 

سنبل

 

شفت..

ضحكة حزن ,

من الحزن..تكتل

ودمعه ,

ابشتلة الفرحه

فرح..تشتل

وجراد,

ايغيظه تضحك

حبة السنبل  !

 

وفاء أخير

 

شفت..

أحلى رطب

          إنتَ

وشفت ..

أصفى ﮔلب

          إنتَ

وشفت ..

أترف محب

          إنتَ

وشفت..

روحي عليك اتموت

من بعد اﻠﺤﭽي

ابسكته  !

 

   

 ( عودة للبداية ) – ( عودة للفهرس )